اے زندگی اے زندگی

میں بھی چپ ہو جاؤں گا بجھتی ہوئی شمعوں کے ساتھ
اور کچھ لمحے ٹھہر اے زندگی اے زندگی

نیلگوں ہونٹوں سے پھوٹے گی سدا کی روشنی
جسم کی گرتی ہوئی دیوار کو تھامے ہوئے
موم کے بت، آتشیں چہرے، سلگتی مورتیں
میری بینائی کی یہ مخلوق زندہ ہے ابھی
اور کچھ لمحے ٹھہر اے زندگی اے زندگی

ہو تو جانے دے میرے لفظوں کے معانی سے تہی
میری تحریریں دھویں کی رینگتی پرچھائیاں
جن کے پیکر اپنی آوازوں سے خالی بے لہو
محو ہو جانے تو دے یادوں سے خوابوں کی طرح
رک تو جائیں آخری سانسوں کی وحشی آندھیاں
پھر ہٹا لینا میرے ماتھے سے تو بھی اپنا ہاتھ

میں بھی چپ ہو جاؤں گا بجھتی ہوئی شمعوں کے ساتھ
اور کچھ لمحے ٹھہر اے زندگی اے زندگی